Eine hübsche Frau

Ik bin vandemiddag mit Fettje naor Wolvege west om wat bedderi’je te kopen. Ik hebbe gelokkig overal hulptroepen veur die opreupen wodden kunnen a’k daenke dat die krek wat meer in- en overzicht hebben as ik dat hebbe. We hebben vuuf kussens, een dekbeddehoes mit twie kussenslopen en een molton metrashoes kocht. Zok soort bosschoppen doe ‘k wel vaeker mit Fettje. Ik daenke dat winkelvolk wel vaeke daenkt dawwe op alle menieren bi’j mekeer heuren. Ze kun vanzels ok van slag raeken. Dat vien ik wel aorig. We weren een keer in et bronnebad van Ni’jeschaans doe d’r een dikke Duutser mit een snor op me toe zwom en zee: “Sie haben eine hübsche Frau.”  Ie kun een protte zeggen van dikke Duutse mannen mit snorren, mar disse hadde een butengewoon goeie smaek wat vrouwluden anbelangt. Hieronder nog een foto die ‘k vandaege vanuut mien slaopkaemerraem maekt hebbe. Et is dudelik da’k niet mit de auto bi’j huus kommen kan. Mar et wark gaot hadde. D’r ston vuuf weken veur en ze zitten now in de twiede weke en et is een stok henne al klaor. Et wodt in ieder geval hiel mooi.