Eilandgasten

In et ziekenhuus en thuus he’k de laeste twie weken de boeken Eilandgasten en De avondboot van Vonne van der Meer nog es een keer lezen. Et is een serie van drieje, ik zal et laeste diel ok nog weer lezen. Et blieven prachtige boeken. Ze speulen op et mooie eilaand Vlielaand en gaon over de meensken die daor heur vekaansie deurbrengen in et vekaansiehusien Duinroos. Op die meniere leer ie alderhaande meensken kennen die mit hiel verschillende bedoelings naor et eilaand kommen. Sommigen kommen d’r al jaoren. Et aorige is dat pattie meensken uut Eilandgasten ok weer in De avondboot veurkommen. Ie kun ok mitlezen wat ze in et gaasteboek schrieven. De warkster die daor de boel schonehoolt, de gaasten wat in de gaten hoolt en lest wat ze schreven hebben verbint de verschillende verhaelen as et waore. Ik wol dat ik zokke mooie verhaelen schrieven kon. Ik hebbe ooit een verhael van Vonne van der Meer in et Stellingwarfs vertaeld veur de bundel Verrassend Stellingwarfs. Dat was Benauwdhied veur de achtbaene uut heur verhaelebundel Het limonadegevoel en andere verhalen.