Eerste volle weke

De eerste volle weke van de Eupen Stal zit d’r op. Et is de laeste twie daegen beheurlik drok. An et begin van de weke kwam d’r nao half vufe praktisch niks meer en dan gong ik lekker butendeure zitten te lezen. Mar dat kan de laeste daegen niet meer. Et lopt now eins almar deur. Ik hebbe vandaege om drie menuten veur zesse nog een boek verkocht an een vrouw uut Haulerwiek. Haarm en Jacob kwammen vandemiddag ok langes, op ‘e fiets vanuut Et Vene. Ik hebbe graeg dat goeie vrunden langeskommen en zeker as ze flink wat centen in de buse hebben. Hieronder een foto die ‘k vandemiddag om goed half iene maekt hebbe. Dit is de Willinge Prinsstraote in Berkoop. Dit uutzicht heb ik vanuut mien verkoopruumte. Et is op ‘e foto nog hatstikke stille en rustig, mar goed een half ure laeter zollen de eerste kuierders en fietsers op mi’j an de weg daelekommen. Vanaovend maek ik nog een grote panne mit makkeroni klaor en dat verpat ik dan over bakkies veur in de vriezer. Dat is makkelik. Ik ete now elke dag waarm om elf ure morgens en pakke dan een bakkien uut de vriezer dat in de ovend kan. Zo moet et disse weken mar. Een betien mit de Fraanse slag, mar ik kriege liekewel wel zat.