Eerste optreden

Gisteraovend ha’k et eerste optreden van et ni’je vertelseizoen. Et was trouwens optreden nommer 3238. Ik moch vertellen veur een goeie zeuventig leden van ’t Nut in et vroegere Nutsgebouw in Wolvege. Ik hoefde et daor trouwens niet allienig te vertonen. Ik moch optreden mit de drie manluden van de Klebienders. Dat zanggroepien van drie manluden bestaot sund 2017 en ze zingen maffe, mooie en verrassende lieties in et Stellingwarfs, Nederlaans en Engels. Hiel mooi! We zullen in oktober nog een keer tegere optreden, dan in et Drafcentrum in Wolvege. D’r was me vraogd en vertel veur et schoft wat serieuzere verhaelen en nao et schoft humoristisch wark. Op ien verhael nao gong alles goed, mar ik las veur et schoft ok een pat van een verhael veur uut Naozoemerlaand en dat gong even mis. De mikrefoon zakte twie keer naor beneden en ik raekte mien stemme even kwiet deur de waarmte in de zael. Een inkelde keer he’k dat vaeker. Een peer slokkies waeter doen dan wonderen. Mar et is vervelend as et gebeurt, veural veur mezels, want ik bin een perfektionist en daor heuren zokke ongemakkies niet bi’j. Hieronder een foto die gisteraovend maekt is deur Lenus van der Broek. Dit bin de Klebienders. Van links naor rechts: Bauke Modderman, Johnny Mulder en Jan Oosterhof.