Eerste fietstocht

We hebben bi’j de man van Fietspunt Exloo veur drie daegen elk een elektrische fiets huurd. Hi’j het ze bi’j oons huus brocht. We praoten Stellingwarfs tegen die man, hi’j praot Drents weeromme. Tegen oonze buurvrouw hier praoten we ok Stellingwarfs. Zi’j woont in Bemmel, mar komt van Ni’jverdal en praot dus Sallaans. Et was vandaege prachtig fietsweer, dat we hebben een fietstocht van zoe’n veertig kilemeter maekt. De temperetuur leup op naor 21 graoden. We bin deur de bossen bi’j Exloo fietst, bi’j soms al wat bluuiende eerpelvelden langes, boswallen mit bluuiende zoegepappen en overal velden vol bluuiende wilde bloemen. Ok as stroken bi’j hoeken bouw langes. Margrieten, roggebloemen, klaprozen. Schitterend! Laeter fietsten we ok nog deur heide- en bentevelden. Wat een mooi laand! We hebben nog gien witte wieven zien, mar zoks is mar en kwessie van tied. We bin deur Bronneger kommen. Daor woonde tot zien dood, een peer jaor leden, de Drentse schriever en dichter Gerard Nijenhuis. Hi’j kreeg in 2006 et eerste exemplaor van mi’j van mien autobiografische roman Een brogge van glas. Dat is dus al weer 20 jaor leden! We kwammen ok deur Drouwen. In Borger hewwe eten had in resteraant Hunebedcity. Wie verzint toch zoe’n vreselike naeme? Et eten was d’r trouwens lekker: flintbrood mit rookte zalm. Van Borger biwwe naor Odoorn gaon. Daor hewwe nog even naor de Plus west. En doe deur de bossen weeromme naor oons huus in Exloo. Hieronder twie foto’s die ‘k vandaege maekt hebbe. Boven: velden vol wilde bloemen. Onder: de karke van Odoorn.