Een vliegerige dag

Vandemorgen bin ‘k op ‘e fiets naor fysiosport in Wolvege west. Et was best wel fris. Daornao he’k een bakkien drinken bi’j Jarmo had en ik hebbe mien powerbank ophaeld die hi’j veur me besteld hadde. Ik hebbe ok nog wat boeken weerommebrocht naor de biebeltheek. Thuus was Anke doende en maek et huus schone. Nao et eten bin ‘k weer op ‘e fiets stapt en naor Zaandhuzen gaon. Daor he’k de belastingboel weer ophaeld bi’j Joop, mien belastingman. Die hadde eerst een kantoor in Wolvege, mar hi’j warkt now van huus uut. Weer thuus het Jarmo even op ofstaand mien scanner weer anzet, want die dee et inienend niet meer. Ik begriepe niks van zoks. Ik kon now dus ok de kaorte scannen die me vandeweke toestuurd wodde deur Harry en Frans. Die weren op et vroegere eilaand Schoklaand. Ze schreven dat Museum Schoklaand prachtig wodden was. Hieronder de kaorte die ze me stuurden mit daorop een eulievarve-schilderi’je op doek van Hermanus Koekkoek (1815-1882). Op et schilderi’je is Schoklaand te zien. Een prachtig schilderi’je in de romantisch-realistische stijl. Hermanus Koekkoek was een lid van de bekende schildersfemilie Koekkoek. Hermanus was een zeune van de marineschilder Johannes Hermanus Koekkoek.