Een tijdloze liefde

Veurda’k naor et ziekenhuus mos, he’k de roman Een tijdloze liefde van Santa Montefiore lezen. Op iene nao he’k alle romans van heur in de boekekaaste staon. Et bin heerlike boeken om (zeker in de vekaansie) te lezen. In et Noord-Italië van de jaoren dattig gruuit Evelina op as de knappe jongste dochter van de femilie Pierangelini. Ze is verliefd op Esra Zanotti, de zeune van een Joodse winkelman. Mar as Mussolini in 1939 een verboond slöt mit Hitler komt de toekomst op losse schroeven te staon.  De vader van Esra daenkt dat de nazi’s heur as Italiaanse patriotten wel mit ruste laoten zullen. Mar ze wo’n allemaole oppakt. As d’r nao de oorlog gieniene van de femilie Zanotti weerommekomt, gaot Evelina naor Amerike. Ze zal Esra grif nooit weerommezien… Een prachtige roman!

Vandemiddag he’k veur de eerste keer weer even fietst. Ik hebbe wat bosschoppen daon in Wolvege. Hieronder nog een foto van gister die ‘k tiedens oonze boottocht maekt hebbe. Dit mooie schip ligt in Wartena.