Een straolende Keuningsdag

Et was vandaege straolend weer op Keuningsdag. Dat was hiel mooi veur alle evenementen. Ik hebbe op ‘e tillevisie naor Keuningsdag in Dokkum keken. Ere wie ere toekomt: Dokkum het d’r wat prachtigs van maekt! Ik vun et mooier as in aandere jaoren. Dat komt vanzels ok omda’k geregeld in Dokkum west hebbe en et allemaole toch wel wat bekend veurkomt. Wat toch een mooie stad aj’ dat van bovenof bekieken kunnen. Et was een enthousiast feest. Waor ze een iesbaentien anlegd hadden was vanzels een ikonisch plak veur de keuning. Veertig jaor leden ree hi’j as jonge kerel onder de naeme W.A. van Buren de Elfstedetocht en op dat plak stempelde hi’j en keerde doe weeromme veur et laeste en ongetwiefeld slim drege stok naor Liwwadden. In een zelde soort jak mit de naeme W.A. van Buren op ‘e rogge stapte hi’j daor weer op ‘e redens. Zoks vien ik mooi.

Ien ding vien ik niet mooi an disse dag. Sund vleden jaor is d’r gien Oranjekonsert meer van de kristelike brassband Euphonia in Wolvege. Dat mis ik slim. Wodt et te duur? Et was altied een prachtige tredisie en een sfeerrieke ofsluting van Keuningsdag en vroeger Keuninginnedag. Vleden jaor wodde me verteld dat et now om de twie jaor hullen wodden zol. Mar dat is dus niet zo. Komt et echt niet weer? Dat zol doodzunde wezen. Dan mar een peer oolde foto’s. Jaorenlaank was ik bi’j et Oranjekonsert betrokken. Ik schreef en vertelde speciaole verhaelen veur die aovend. Ik prissenteerde tegere mit Hans Koekkoek en dee dat ok een jaormennig allienig. Dat dee ik in ieder geval in de jaoren 2008 en 2010. Zie de foto’s hieronder. Boven: hier kondig ik in 2008 Syb van der Ploeg an. Middags stonnen d’r al kloften jongemeiden veur sporthal De Steense te waachten. Ik docht eerst nog dat ze veur mi’j kwammen. Mar nee… Syb dee vandaege ok in Dokkum mit. We bin allebeide wel achttien jaor oolder wodden. Onder: hier kondig ik in 2010 de bekende Limburgse zanger Ge Reinders an. Wat een goeie en mooie herinnerings!