Een roezige dag

Et was een drokke en roezige dag. De beide mannen van Punter Electronica Service hebben gistermiddag een groot knieft bi’j me liggen laoten. Dat he’k vandemorgen dus mar even naor heur toe brocht. Ik bin mitien naor et gemientelik ofvalstesjon west en daor he’k de oolde stereotoren en de boxen mit alderhaande draodeboel ofleverd. Vot mit et oolde spul! Vervolgens he’k naor de Schrieversronte in Berkoop west. Daor he’k alles inricht veur keunstmannefestaosie Eupen Stal die zaoterdag begint. Ik zal daor 26 van de 30 daegen anwezig wezen. Meensken kun boeken van en bi’j me kopen en ik signere ze ok. En ik hebbe een mooi veurdielkopien! Vandemiddag bin ‘k weer naor Wolvege west, mar now op ‘e fiets. Ik hebbe wat bosschoppies daon en een peer boeken uut de biebeltheek haeld. Daor trof ik Johan Paulides. We bin d’r beidend bi’j zitten gaon en hebben een schoft praot. Ik kenne him nog van de ulotied. Ik wete nog da’k een keer tussen de middag bi’j him en zien moeder an de Van Nijmegen Schonegevelstraote (vlakbi’j de ulo) waarm eten had hebbe. Wat is dat vreselik lange leden. De laeste keer dawwe mekeer zaggen was in et ziekenhuus doe ik mien eerste staaropperaosie hebben zol. Nogal wat meensken sturen me gewoon nog kaorten toe. Dat vien ik mooi. Vandaege kwam d’r een vekaansiekaorte vanuut Duutslaand van Saakje, Tessa, Famke, Tom en Yang.