Een revolutie ontrafeld

Gister he’k een fluttien erebeien kocht op ‘e mark in Wolvege en daor he’k gistermiddag votdaolik zes potten heerlike sjem van maekt. Ik hebbe now ongeveer veertig potties sjem in de veurraodkaaste staon. Die wat speert die wat het as hi’j de boel niet opvret! Ik bin vandemorgen even op ‘e fiets naor Berkoop west om bi’j de Schrieversronte wat boeken op te haelen veur de verkope. De perveensie Frieslaand wil de Schrieversronte en et Stellingwarfs allemachtig kotten op ‘e subsidie. Veur et Fries een flut extra miljoenen kriegen en de eigen taelminderheden in de onderwal helpen. Normbesef is bliekber een onbekend woord op et perveensiehuus in Liwwadden. Hier zit wel een kollum in.

Veur de staaropperaosies he’k et boek Een revolutie ontrafeld van Jacques Kuiper lezen. Politiek in Friesland 1795-1798. Een boek van 652 bladzieden. Ik hebbe niet alles sekuur lezen. Hoe dat in alderhaande grieteni’jen allemaole percies gaon is was me bi’jtieden wel goed. Et was een roezige tied mit een boel onderling gekilster en vechteri’je. Stadhoolder Willem V was naor Engelaand vlocht en we kwammen hier onder Fraanse invloed. Et volk daanste om de vri’jhiedsboom henne. Vrijheid, gelijkheid en broederschap. Daor kwam niet altied lieke vule van terechte. De Bataafse Rippebliek kwam en laeter et Keuninkriek Hollaand mit Lodewiek Napoleon as keuning, vervolgens wodden we hier een onderdiel van et Fraanse Keizerriek en in 1813 kwam de zeune van de stadhoolder as souverein vost en laeter keuning Willem I weeromme. In de jaoren 1795-1798 hadde iederiene zowat mit iederiene spul. De korrupte regenten mossen opkrassen, mar wat d’r veur in de plak kwam was niet altied vule beter. As et om de macht gaot… Ik hebbe in ieder geval lezen over et beroemde Kollumer Oproer en et gruwelike verrinneweren van de grafkelder en de greven van de Friese Nassaus. Et lood van de kisten wodde verpatst en de geraemten wodden op een hoop gooid. D’r wodde voetbald mit de schedel van Maria Louise (Marijke Mui). Zo gaot et verhael…  As meensken hielemaole gien rem meer hebben, gedregen ze heur minder as beesten. Dat het altied zo west en zal nooit veraanderen. Een droevige konklusie.