Een regenboog in mijn kast

Ik hebbe et prachtige boek Een regenboog in mijn kast van kienderboekeschriever Dolf Verroen lezen. Dolf wodt op 20 november 96 jaor en hi’j het al meer as honderd kienderboeken schreven. Dit is zien ni’jste boek en et is dit jaor uutkommen. Een boek over Jasper… Jasper wet dat hi’j jongen aoriger vint as maegies. Zien oolden weten dat. Veerder wet gieniene et nog. Now ja, zien iene grootmoeder hadde et votdaolik wel in de gaten. Ze geft him een regenbogeriem. As hi’j die omme dot, hoeft hi’j veerder niks te zeggen. Dan is alles dudelik. Jasper legt de rien in zien klerekaaste. En dan komt de schoelevekaansie. An een peer kammeraoden vertelt hi’j dat hi’j homo is. Ze willen niet meer mit him ommegaon. Jasper vint Menno aenlik wel hiel arg aorig, hi’j droomt ok wel es van him, mar Menno was liever een maegien west as een jonge en zit daorover in de put. Zol Jasper de riem ommedoen as de vekaansie veurbi’j is en ze weer naor schoele moeten? Wat een schitterend boek! As ooldere man heb ik dit kienderboek mit ontroering lezen. Dat betekent dat Dolf et prachtig schreven het. In et Hongeri’je van Orbán mag zoe’n boek misschien al niet meer uutgeven wodden. In oonze verrechtsende wereld kun minderheden heur rechten staorigan weer kwietraeken. Wilders is de grote kammeraod van Orbán. Willen we dat et hier ok zoveer komt? Dat boeken van alderhaande schrievers misschien wel niet meer uutgeven wodden meugen?