Een protte volk

Doe ‘k gisteraovend in et Theater op ‘e hoogte in Wolvege kwam veur de Stellingwarver Aovend in et kader van Wolvege bluuit zeden ze tegen me dat d’r 200 meensken kommen zollen. Ik docht eerst dat ze me de gek anstakken, mar et bleek echt waor te wezen. De karke zat vol. Een mooi sukses veur de orgenisaosie! Et was een mooie aovend en et vertellen gong ok wel goed, mar ik vuulde me de hiele tied niet zeker van mezels. Ik ston op een podium in et volle locht en zag de meensken praktisch niet. Dat vien ik slimme lastig. Ik vuul me dan een soortement bliende die wat om him henne taast zonder argens goed grip op te kriegen. Ik prestere et beste a’k dichte bi’j de meensken stao en da’k die meensken goed zien kan. Ik hebbe dit vanzels indertied jaoren mitmaekt mit et jaorlikse Oranjekonsert. Dat was nog grootser. Een groter podium, feller locht en 500 man veur me. Dat was doe ok lastig, mar ik maekte et ieder jaor mit. Now ha’k in lange jaoren niet op disse meniere verteld en ik was d’r hielemaole niet op vervat dat et zo wezen zol. Ik hebbe mien best daon, mar ik hadde naor mien idee beter kund. Vermoedelik hebben Harmen, Karst, Mark en Abel d’r hielemaole gien hinder van had en bin ik de ienige die d’r mit ommetiesd het. Ik hebbe vanzels ok et verhael Sultan uut de bundel Naozoemerlaand verteld dat verfilmd wodden zal en ik hebbe vraogd as d’r misschien meensken weren die eventueel mitspeulen willen zollen in de film. Twie vrouwluden hebben heur bi’j me opgeven. Dat is mooi!

Ik wete niet hoe as jim d’r bi’jliggen te slaopen. Ik wil et niet iens weten. Mar misschien liggen jim wel mit een aarm of bien bi’j et bedde langes. Ien ding weet ik zeker. Poezen bin duzend keer sierliker wezens as meensken. Mit katten vergeleken bin meensken logge wezens. Zie mar es hoe elegaant poes Marja boven op ‘e baank ligt te slaopen.