Een protte mailties mit reakties

Vandemiddag he’k op vesite bi’j Jan en Durkje west in Wolvege. Ik hadde op et aende van november een boek liend van Durkje en dat he’k now weerommebrocht. Dat boek was Het bloemenmeisje van Anya Niewierra. We hebben een peer uurties genoeglik praot en hebben veural de griezelige toestaand in de wereld bi’j de kop had. As wi’j et mit ’n drienend veur ’t zeggen hadden, ston et d’r ongetwiefeld een stok beter veur!

Ik hebbe vandeweke een protte reakties via de mail kregen op mien kollum Stellingwarf first! in de Liwwadder Kraante en vandaege ok al een mail-reaktie op et gedicht Schoelplak da’k veur de gemiente West-Stellingwarf schreven hebbe in verbaand mit de herdaenking van de waetersnoodramp van 1825. In de kollum en et gedicht waorschouw ik tegen et griezelige ultrarechtse geveer dat van alle kaanten op oons ofkomt. Verscheiden meensken weren raekt of kregen traonen in de ogen deur de laeste regels van de kollum. Rienk uut de Wâlden beud me alvast een schoelplak an. Diepvries-Fries Douwe mailde me in et Nederlaans dat hi’j et slim mit me iens is en geniet van mien Stellingwarver kollums. Ik hebbe weerommemaild dat hi’j me in et vervolg as diepvries-Fries in et Fries mailen moet. Jehannes uut Ni’jhooltwoolde mailde me trouwens in et Stellingwarfs: De spieker op ‘e kop! Jemke Visser het een wekelikse kollum in de Harlinger Kraante. Hi’j hadde een soortgelieke kollum in et Nederlaans schreven veur die kraante en die stuurde hi’j me toe. Dat is aorig. Hi’j schrift trouwens ok in et Harlingers en et Fries. Ton uut Noordwoolde mailde: Op een niet mis te verstane manier weet u iets wat ver van ons bed lijkt persoonlijk grijpbaar te maken. En d’r weren wel meer reakties. Dudelik was dat een protte meensken heur grote zorgen maeken angaonde et ultrarechtse geveer.