Een ni’j begin!

Een ni’j jaor en een ni’je website. Et is in alle opzichten een ni’j begin. Ik hebbe gister en vandaege tientallen mailties kregen van dagboeklezers en aander aorig volk. En ze hadden allemaole een protte lof veur die ni’je website. Die lof komt Pieter de Vries dus toe, mien ni’je webmaster. Ik stikke him op disse eerste dag van et jaor een grote toefte veren op zien daenkbeeldige hoed.. Laot et ok een betien een ni’j begin veur mi’j wezen nao een halfjaor zonder website en een tied van overspannen wezen. Dat is nog niet hielemaole weer over, mar et gaot de goeie kaant weer op!
Ik hebbe et gisteraovend slimme genoeglik had bi’j Haarm en Jacob in Et Vene. Ik was d’r om acht ure. We hebben gezellig bi’jpraot, naor de tillevisie keken en et vuurwark. En wat ok slimme belangriek is: ze hadden lekkere happies en draankies. Ik waachte daor altied totdat et in Londen ok ni’jjaor is. Dan kieken we nog even naor et vuurwark bi’j de Theems. Ik was om kwat veur twieje thuus en bin om half drieje op bedde gaon. Poes Marja kwam me miauwende integen doe ‘k de veurdeure losdee. Die was bliede da’k d’r weer was!