Een nieuw begin

Vandemiddag he’k Jelle en Gerda op vesite had. Ze brochten nog een prachtig boeket bloemen veur me mit vanwege et uutkommen van mien laeste verhaelebundel Naozoemerlaand. Dat is vanzels slimme aorig, mar et hadde niet hoefd. De kaemer is d’r liekewel hielemaole van opfleurd!

Ik hebbe de roman Een nieuw begin van Ellie Dean lezen. Et boek begint in 1939. Engelaand raekt in oorlog mit Duutslaand. Duzenden kiender uut Londen wo’n overbrocht naor et plattelaand. De 16-jaorige Sally en heur kleine breurtien Ernie, die veur een pat verlamd is deur kienderverlamming, kommen in Cliffehaven terechte, een plakkien an de kust in et zuden. Daor kommen ze in huus bi’j de moederlike Peggy. Nao alle ellende in Londen mit een moeder die an de draank is en een vader die nooit thuus is, is Beach View House een oase van rust veur de beide kiender. Totdat heur moeder heur aachternao reist… Een mooi boek!