Een mooie en peperdure dag

We bin d’r vandaege op uut west, mar wel in de buurt bleven, en dure ankopen daon. Ik hebbe d’r een protte geld deurhenne jacht. We bin eerst naor de Welkoop in Jubbege west en daor he’k sokken en een mooie buuslanteern kocht. Vervolgens biwwe naor Rinsma op ‘e Gediek gaon om kleren te kopen. Ik hebbe vanzels meer kocht as da’k eerst van doel was. Ik hebbe twie broeken en twie boezeroenen kocht. Mar de beide hiele mooie boezeroenen weren veur de helte van de pries. Iene broek zal nog een tippien inkot wodden, die hael ik ankem weke donderdag op. Ik kreeg nog een kotting omda’k jaorig west was. Mar toch… We wodden daor zoas altied vreselik plezierig hulpen en we kregen een bakkien drinken mit een hiempien appelgebak. Doe biwwe naor mien fietsezaeke in Wolvege gaon en daor he’k een ni’je elektrische fiets kocht. De oolde is zeuven jaor en die ruil ik dus in. Morgen over een weke kan ‘k him ruilen veur de ni’je. Et is een mooien iene, mar die dingen bin niet veur niks. Mar waoromme za’k et niet doen? Dit zal mien laeste wel wezen… Van Wolvege biwwe laeter naor Berkoop west. Daor he’k bi’j de netaoris et levenstestement tekend. Now is dat ok regeld. En doe hewwe in resteraant De Rustende Jaeger in Hooltpae zokrek nog lekker waarm eten had.

Hieronder nog een foto van gister. Lenus van der Broek maekte disse foto van mi’j en kultuurwethoolder Roelof Theun Hoen van West-Stellingwarf. De wethoolder hoolt de mikrefoon vaaste en ik leze mien gedicht veur tiedens de herdaenking van de waetersnoodramp 1825.