Een midweke vot

Dit is een vroeg dagboekstokkien, mar ik zal now even een midweke vot. Gerda brengt kammeraod Jelle uut Sneek hier aanst, dan drinken we hier nog wat, en dan gaot Gerda weer naor Sneek en wi’j mit mien auto naor Lochem. Daor zitten we vandeweke in een husien. Now ja, hopelik niet altied. Et is lange niet zo waarm meer, dat is niet slim, as et mar niet algedurig regent. Awwe mar lekker wat fietsen kunnen. We zollen graeg de Achtkesteletocht van Vorden nog es fietsen. Die hewwe in 1965, dat is werachtig al 59 jaor leden, ok mit Jan en Thomas fietst en laeter nooit weer… We zien wel wat et wodt. Poes wodt veur zorgd! As et mit de wifi lokt, kommen d’r gewoon daegelikse dagboekstokkies. As et mit de wifi niet lokt… dan moe’n jim waachten tot vri’jdagaovend. Dan kom ik weer thuus. Mar ik gao d’r vanuut dat et lokt en da’k daegeliks verslag doen kan.

Vandemiddag eupent Computerservice Hofma de deuren an de Industrieweg 15 in Wolvege. Vanof 1 ure kuj’m daor de boel bekieken en de happies en draankies staon klaor. Gao d’r mar even henne! Et spiet me slim dat ik d’r niet bi’j wezen kan, mar ik kan niet op twie plakken toegelieke wezen. Ik weens Jarmo daor alle gelok van de wereld toe! Hi’j verdient et! Zie hieronder. Zo zicht et d’r now an de buterkaant uut.