Een ingewikkelde wereld

De wereld wodt me zo staorigan vusen te ingewikkeld. Ik vatte en overzie et allemaole niet meer. Om zoe’n lietien over poes Marja en mi’j onder mien dagboekstokkien te kriegen… Ik kan zoks niet, daor he’k de hulpe van Jarmo en Pieter veur vanneuden en a’k Jarmo dan op ofstaand mit mien komputer doende zie en d’r van alles over mien beeldscharm henneflitst bin ‘k bange dat van alles in ’t wilde raekt. En dan zo’k him alweer vraogen moeten hoe et moet. In Goes was de boel ok in ’t wilde. Op vri’jdag vullen mien beide heurapperaoten uut. Een ramp, want dan bin ik zwaor handicapt. Et laeste ure kon ‘k mar kwaolik mit Roelien praoten. En ik hadde ze naachs wel an de oplaeder daon. Hoe kon dat now? Et wodde me staorigan dudelik. Vroeger kreej’ een sleutel veur je hotelkaemer. Now kriej’ een passien. We versmoren mit mekaander in de passiesrotzooi. Straks hewwe nog een passien neudig awwe thuus naor ’t husien moeten. Wat is d’r mis mit een sleutel? Now ja, de deure klikte los doe ‘k et passien argens veur hul. Mar om locht en elektrisch te kriegen in de hotelkaemer mos dat passien weer argens indrokt wodden. Mar dan begon toegeliekertied de ventilaosie nogal koolde locht de hotelkaemer in te blaozen. Et leek me niet goed toe om naachs in de tocht te liggen. Ik hebbe een keer mit mien executeurs eten in een dorp in Grunningen onder een ventilater. Daor he’k een aekelike heufdzeerte van kregen daor a’k veur behaandeld wodden mos. Dat dus niet weer. Dan de stroom naachs mar uut. En zodoende is de boel dus niet oplaeden en zat ik daor weer mit. Ik zal van ’t jaor zeker nog wel een peer keer in dat hotel kommen. Misschien dat ik een powerbank kopen kan en daor de boel dan an oplaeden kan en dan veerder de stroom uut. Zol dat een oplossing wezen? Mar wat is een goeie powerbank? Wat toch een aekelike en ingewikkelde wereld!

Vandemiddag he’k op ‘e fiets naor fysiosport in Wolvege west. Omda ‘k vleden vri’jdag niet kon deurda’k in Zeelaand was, gao ‘k disse weke twie keer naor fysiosport.