Een heerlike fietstocht

Et was vandaege prachtig weer mit een oplopende temperetuur naor 18 graoden. We hebben vandemorgen de fietsen aachter op ‘e auto zet en bin naor Appelsche gaon veur een fietstocht van 42 kilemeter. We bin van daor over Waoteren en Doldersum naor Diever reden. As hiel klein joongien moch ik ooit es mit om oonze bi’jen naor de heide van Doldersum te brengen. Dat gebeurde mit et vrachtwaegentien van Piet Riekmaans uut Steggerde. Ik wete et nog percies. Bi’j Riekmaans en die hadden ze een kostganger: Bas van der Veer. Die was jaeger en jachtte wel mit mien omke. Dat schiet je dan, al fietsende, allemaole in de zin. In Diever hewwe op et terras van resteraant ’t Keernpunt zeten. We hebben wat drinken en een beste hiempe appelgebak mit slagroom had. Via een aandere en schitterende route deur de bossen biwwe doe weer naor Appelsche fietst. Op et terras van Family hewwe om vier ure wat drinken en een twaelfuurtien had. Wat een mooie dag! Hieronder twie foto’s die ‘k vandaege maekt hebbe. Boven: de karke van Diever aachter et frisse veurjaorsgruun. Onder: et hunebed van Diever.