Een dag onderweg

Ik bin vandaege onderweg west en poes het op et huus past. Vandemorgen he’k op vesite west bi’j Tjerkje en Minne in Liwwadden. Minne is gien man, mar een mooie en nog jonge stabij die hoge op ‘e poten staot. Tjerkje hadde de orchidenen, zoas gebrukelik, prachtig bluuiende op ‘e veensterbaank staon. Ze bin heur flat mit alle appattementen sund meie an et opknappen en energiezuniger maeken. Zoks geft vanzels een protte drokte en ongemakken. Mar et is mooi dawwe now weer es bi’jpraot hebben. Nao de vesite an Tjerkje en Minne bin ‘k ok in Liwwadden op vesite gaon bi’j Geertje en Sieger. Sieger is wel een man. Daor he’k eerst een lekker brotien kroket had en een overheerlike kop soep van zute eerpels en pompoenen. In die rottekruutdure resteraants mit iene of meer michelinsteerns mochten ze willen dat ze zokke lekkere soep klaormaeken konnen! En netuurlik hewwe weer hielemaole bi’jpraot. Ik bin daor betied weer votgaon, zoda’k veurdat et donker wodde weer thuus was. Hieronder een foto van Tjerkje en Minne die daegs meerdere keren een tippe kuieren.