Johan Veenstra
Stellingwarver schriever en verteller
Plaetst op 21 oktober 2024.
Ik hebbe de hiele dag in et wondermooie Twente west. In Ooldenzaal om percies te wezen en daor wa’k op vesite bi’j mien vroegere buurmaegien Jannie (Houtman) en heur man Geert (Brander). Jannie en ik bin lieke oold en indertied toegeliekertied op ‘e legere schoele kommen. We mossen op een keer veur de klasse kommen en tegere een lietien zingen van juffer Peenstra! Dat schept vanzels een baand veur et leven. Laeter zatten we op ‘e ulo in Wolvege en we deden et huuswark wel es tegere bi’j Jannie thuus. As daor altied wel wat van terechtekwam is weer wat aanders. Nao de ulo kwam Jannie op et gemientehuus in Wolvege en ikke op ‘e belastinginspektie in Et Vene an et wark. Ik bin altied in Ni’jhooltpae bleven, Jannie is trouwd mit Geert, die van De Tienje kwam, en via Luttelgeest en Vollenhove in Ooldenzaal terechtekommen. Op ‘e Eupen Stal in Berkoop trof ik vandezoemer Aafje Bouwer, die now in Franeker woont, mar de dochter is van Jannie heur zuster Vroukje. Zi’j zee dat ze nog es naor tante Jannie en ome Geert wol. En doe is et idee ontstaon en gao d’r tegere een dag henne. En dat is een hatstikke gezellige dag wodden. Veur de corona weren ze al es bi’j mi’j op vesite west. Al die jaoren tussen vroeger en now vullen zomar weer vot en de mond het oons vandaege haost gien tel stillestaon, zovule hawwe te bepraoten. We kregen eerst drinken mit een heerlike hiempe gebak en et aorige was dat zeune Evert d’r eerst ok was. Die woont op mar vierhonderd meter van zien oolden, dus dat was makkelik. We vunnen et mooi dawwe die ok even zien hebben. We hebben d’r in de loop van de middag heerlik waarm eten had en om kwat veur vufe henne biwwe daor weer in de auto stapt en deur et prachtige Twentse laand mit mooie haastkleuren weer naor de Stellingwarven gaon. Aafje het me thuusbrocht en is doe weer naor Franeker reden. Een prachtdag die aenlik beslist es een vervolg kriegen moet!