Een dag mit Jarmo

Een dag mit Jarmo betekent never a dull moment. Vandemorgen om kwat veur elven was ik bi’j et onderkommen van zien komputerservicebedrief. Hi’j het eerst mien auto van binnen haost hielemaole schonemaekt. Neffens him was et smerig. Et was mi’j niet zo opvalen. Daornao biwwe mit mien auto naor mien huus gaon. Daor het Jarmo de printer weer aktiveerd. Hi’j vun dat mien komputer vusen te traoge was. Dat was me ok nooit zo opvalen. Mar dat mos dus allemaole vlogger. Veurda’k et in de gaten hadde, hadde hi’j een schoffien leden al een bericht naor kpn stuurd en die stuurden drekt een bericht weeromme dat d’r oflopen vri’jdag een monteur kommen zol. Die kwam dus ok. Een jonge kerel mit een baord. En doe die weer vot was, hadde ik raozendvlogge internet, mar de printer dee et niet meer. Raodeloos kan ‘k van zoks wodden. D’r was wat mit de wifi… Ik hebbe gien grip op zoks, snappe d’r niks van. Mar de printer dee et nao wat technische ingrepen van Jarmo dus ok weer. Aj’ zoe’n jonge kerel in huus hebben moej’ daor van profiteren. Et spiegellaampien boven de wastaofel in de does dee et niet meer. Jarmo het dat ding d’r uutschreuven en we bin naor de Praxis in Wolvege gaon. Daor zeden ze dat zokke laampies niet meer maekt wodden. Ze hadde d’r nog drieje. Op advies van Jarmo he’k die alle drieje stark ofpriesd kocht. Tot mien 110^de ha’k doe grif wel laampies. Doe weer naor Ni’jhooltpae. Jarmo zette d’r een ni’j laampien in, mar die dee et ok niet. Et dee blieken dat d’r een hiel ni’j armetuur op mos. We bin doe eerst naor wegresteraant De Stoof west en daor hewwe wat lekker eten en drinken had. En doe weer naor de Praxis om zoe’n armetuur. Daor gong et alaarm of doe ik d’r in kwam. Eerder niet, now wel. Uuteindelik bleek et deur de beurs in mien tasse te kommen. Mar waoromme doe wel en eerder niet? Ik hadde niks aanders in de beurs. Dat is dus een raodsel bleven. We bin doe weer naor Ni’jhooltpae gaon en doe bleek dawwe gien goeie schroefies hadden. Goddaank hadde overbuurman Johan Moes die wel. En doe het Jarmo de ni’je armetuur d’r op zet. En simsalabim, ik hadde weer locht. Ik zitte now wel mit drie ofpriesde laampies… We bin vervolgens weer naor Wolvege reden, naor Fraans autoglaans. Daor biwwe tegere mit de auto deur de wasstraote west en doe het Jarmo et van binnen schonemaeken ofmaekt. Alle keren dawwe in mien auto henne-en-weer jakkerden, zette hi’j knalmeziek van himzels an. Een kerel raosde van Echte liefde is te koop. Jarmo galmde krek zo hadde mit. D’r was trouwens nog vule slimmer kebaol. Vreselik. Ik komme uut de tied van de Selvera’s en Annie de Reuver. Daor hadde hi’j nog nooit van heurd… Doe ‘k nao een enerverende dag om vier ure thuus was, bin ‘k sebiet naor et karkhof gaon. Daor vien ie de meerste rust. Ik hebbe wat wieded bi’j de femiliegreven. Ik wete zeker da’k aanst veur de tillevisie in de slaop valen zal. Echte liefde is te koop, heur ik dan in een droom iene beulen…

Hieronder nog een peer foto’s van de slim rustige dag van gister. Boven: Jan en ik kriegen uutleg in meule De Weijert in Makkinge van ien van de mulders. Onder: hier zitten we in resteraant Boszicht in Ni’jberkoop, vlak veur et eten.