Een betien gammel

Ik murk gister al da’k wat gammel en weer verkolen an ’t wodden was. Ik hebbe vandaege zodoende niet alles daon wat a’k van doel was om te doen. Vandemorgen wa’k even veur negen ure al bi’j Jarmo. Ik hebbe d’r een peer bakkies drinken had en doe hewwe een peer daotums ofpraot veur wasbeurten van de auto. Hi’j zit onder et zoolt, dat moet d’r vanzels een keer ofwusken wodden. Dat zoe’n ding van binnen en van buten ok gewoon wat smerig is maekt me niet zovule uut. Ik hebbe him om van a naor b te kommen en niet veur de mooiighied. Mar aanderen daenken daor hiel aanders over. Nao et opschrieven van oonze ofspraoken bin ‘k naor fysiosport kuierd, honderd meter veerderop. Doe ‘k thuuskwam was Anke et huus an ’t schonemaeken. Ik hadde nog naor twie dingen toe moeten vandaege, mar ik hebbe iene verplichting schieten laoten. Ik hadde vandemiddag naor resteraant Bruiss in Wolvege zuld. Nao meer as twintig jaor nemt Annet Stokroos ofscheid as dokter van huusdokterspraktiek De Cleijenburgh. Et was van vier ure tot half zeuven mit meziek van heur zeune, die zien kammeraodske, en muzikaole vrunden. Ik hadde heur graeg even de haand geven wild om heur te bedaanken veur alle goeie zorgen en heur alle goeds toeweensken wild. Ik hadde me d’r veur opgeven, mar vuulde me wat te gammel en zag d’r tegenop. Ik neme an dat daor gieniene bi’j de deure staon het om te konterleren as ik d’r wel was. Och now ja, Máxima moet op ’t heden ok al van alles ofzeggen omdat ze grieperig is. Et komt in de beste femilies veur. Ik perbere nog wel en vertel vanaovend een peer keer een verhael in Museum ’t Kiekhuus in Wolvege. En dan zol et me niet verbaozen a’k ankem weke meer dingen ofzeggen moet.