Dwingelderveld

We hebben vandemorgen de fietsen aachter op ‘e auto zet en bin naor Dwingel reden. Daor hewwe een wondermooie fietstocht maekt over et Dwingelderveld. Et was echt prachtig fietsweer: achttien graoden en volop zunneschienweer. De laeste fietstocht van vleden jaor hewwe in dichte mist over etzelde Dwingelderveld reden. Dat hadde ok wel wat. Mar wat was et vandaege mooi. D’r weren een protte fietsers. Onderwegens zaggen we twie schaopskudden. Een grote en een kleine. Van de grote he’k foto’s maekt. Et was prachtig om de drie honties doende te zien. Ze hadden et spul hielemaole onder stuur. Daor kan Dick Schoof niet an tippen. Die liekt hielemaole gien stuur te hebben over de Haagse kroje vol kikkers. We hebben wel een half ure staon te kieken hoe de honties dat deden. Dan draefden ze weer een tippe en dan gongen ze weer plat op ‘e boek liggen. De huder hadde ok nog twie grote honnen bi’j him an et touw. Alle fietsers stapten of en maekten foto’s. We hebben vandemiddag eten op et terras van resteraant De Brink. We hebben allebeide petat had en een echte Drentse gehakballe. Dat was te pruven! Zokke lekkere Friese gehakballen bestaon d’r niet. Hieronder twie foto’s. Boven: meensken zetten de kudde op petret. De schaopen nammen et fietspad ok in beslag. Onder: ien van de honties die de boel goed in de gaten hul.