Dwingel

Maendag en deensdag kon ‘k mar hiel weinig meer heuren deur et vervelende virus. Dat is now weer beter, butendat bin me de oren vandemorgen uutspuit. Et rechter moet ankem weke nog een keer. Wat een gedoe allemaole. En dan zal binnenkot grif de tiedinge kommen da’k mien jaorlikse daarmonderzuuk hebben moet. Mar poes zorgt altied veur ofleiding. Doe ‘k gisteraovend even in mien warkkaemer was, brocht hi’j me daor een levendige moes. Wat een vervelend gedoe. Uuteindelik ha’k de moes in et aachterhuus en he’k daor de buterdeure loszet. Ik bin mit poes in de kaemer gaon en zo kon de moes nog lieke levendig et huus weer uutkommen.
Ondaanks et virus he’k de drokproef van mien ni’je boek wel hielemaole naokeken. Misschien wat minder scharp as aanders, mar dan blieven d’r mar een peer fouten inzitten. Een protte dingen die ‘k kursief anleverd hadde weren now inienend niet kursief meer. Dat soort dingen. Ik hebbe et vandemiddag naor vormgever Sijtze Veldema in Dwingel brocht. Sijtze zal alles verbeteren en dan krieg ik et weer van him en bekiek ik de verbeterings weer. Zo holen we mekeer an et wark. In Dwingel he’k een foto maekt, et was d’r mooi en zunnig weer.