Durk van der Ploeg

Van verschillende kaanten wodde ik attendeerd op een fout in et dagboekstokkien van gister. Ik schreef juni in plak van meert. Dit kan vanzels slietaoge an et benul wezen. Dan zal et allienig mar slimmer wodden. Et kan ok wezen dat et hier nogal roezig is en ik wel es wat tevule wark hebbe. De afentoelezer die me d’r over mailde he’k weerommemaild, mar dat bericht kwam niet bestelber weeromme.

Vandemorgen om goed acht ure wa’k al bi’j de Welkoop in Wolvege, want daor kreej’ vandemorgen op haost alle koopweer twintig percent kotting. En dan kommen de meensken wel! Vervolgens bin ‘k mit de trein naor Liwwadden gaon. Daor was in de Afûk-boekwinkel een literaire morgen mit Durk van der Ploeg die van ’t jaor 95 jaor wodt. Durk wodde interviewd deur Arjen Dijkstra van Tresoar. Et was een prachtige morgen. Durk vertelde dat hi’j elke dag vuuf uren schrift en ok een protte lest. Elke schriever moet ok een protte lezen, want daordeur kuj’ een protte opstikken en gaoj’ zels ok beter schrieven. Hi’j lest graeg literaire romans van Skandinavische schrievers. Zien laeste boek is krek uut: De neidagen. In september komt d’r al weer een ni’j boek. Hi’j las d’r zonder brille een stokkien uut veur. Ik hebbe zien roman In fauna fan ingels kocht. Dat was et ienige boek van him da’k nog niet hadde. Ik kreeg daor et boekewekegeschink De krater van Gerwin van der Werf bi’j in de Friese vertaeling van Jetske Bilker. Ik hebbe ok nog de eerste roman in et Bildts, Blau fan dagen, griis fan ônrust, van kollega Gerard Marcel de Jong kocht. Et boek het vleden jaor de Rink van der Veldepries kregen. Daor bin ik doe bi’j west. Dat boek heur ik vanzels te hebben. Arjen Dijkstra vertelde dat de verkoop van Friese boeken lange niet meer is wat et vroeger was. De meensken zollen meer Friese boeken kopen moeten. Dat zol een boel perblemen oplossen. Dat gelt vanzels ok veur et Stellingwarfs. Koop boeken, volk. Ze bin ok prachtig om as kedogien vot te geven. Ik trof daor een boel kunde: Bertus Mulder, Geart de Vries, Hein van der Vliet en Asing Walthaus die now ok weer kollums in de Liwwadder Kraante schrift. Durk het een boel boeken signeerd. Hi’j zee dat hi’j mien laeste kollum over Trump mooi vun. Een vrouw van Amelaand herkende mien stemme van de stiekelstokkies op ‘e radio. En dat is al zolange leden! Ik kreeg daor ok de komplementen vanwege mien kollums over de taeldippeteerde. Et was prima dat ik heur anpakte. En dat heur ie dan in een Fries bastion. Nao ofloop he’k een bakkien drinken had en een tosti thùs in et Fries Museum. Daor trof ik Frits. Die zol daor ok eten en dan naor de film. Hieronder een foto die ‘k vandemorgen in Liwwadden maekt hebbe.