Droom

Ik hebbe vannaacht veur de zoveulste keer droomd da’k weer bi’j de belastingdienst an et wark mos. Et bin vervelende dromen, mar niet gruwelik zoas aanders wel vaeke. Ik zat mit drie aandere mannen in een kaemer en we vormden een team veur de omzetbelasting. Ik wus nargens ok mar wat van of. Now weet ik, a’k niet slaope en drome, ok van een protte dingen niks of, mar dat is weer wat aanders. Ik hadde nog nooit mit de omzetbelasting te maeken had. Ien van de mannen zee dat hi’j vroeger wel es tegen me taofeltennist hadde. Dat kon wel kloppen. Ik hebbe taofeltennissen leerd tiedens et middagschoft in de Veenster belastinginspektie op ‘e hoeke van de Stesjonsstraote en de Herewal. Bi’j de brogge en an de aandere kaant van et waeter ston een kezepakhuus. Nao mien militaire diensttied bin ‘k bi’j OTC in Berkoop kommen. Mit Gerrit Heida en Rein Reitsma speulde ‘k in de kompetisie en overal in Frieslaand. Mien grootste sukses was da’k op iene dag in de oolde Tuundorpschoele van Wolvege kampioen van de Stellingwarven in de dadde en twiede in de twiede klasse wodden bin. Mar ik kon me die man uut de droom niet herinneren. Hadde ik daor ooit tegen taofeltennist? En doe wodde ‘k wakker en wa’k stomme bliede da’k maondeliks mien AOW en pensioen kriege en da’k nooit meer hoeve te warken veur de belastingdienst. Tot de volgende droom, want zoe’n soort droom komt weer!

Vandemorgen he’k 7 potten proemesjem maekt van de proemen die ‘k gister bi’j mekaander gadderd hebbe. Ik hebbe now 23 potten proemesjem maekt en 3 potten brummelsjem en ok 3 potten rooiebeiesjem. Laot de winter mar kommen!

Et het ommeraek vertuten daon da’k de uutbluuide bloemen uut de vlinderpollen knipt hebbe. D’r kommen now allemaole weer ni’je knoppen in en ze gaon nog een keer prachtig bluuien.