Droom

Gisteraovend was d’r inienend een klein voegeltien in de kaemer. Ik daenke dat et een winterkeuninkien was. Et was mar zoe’n ding. D’r kan mar iene verantwoordelik west hebben veur et feit dat dat voegeltien daor was. Poes Marja zat him nao over de veensterbaanken, tussen de bloempotten deur. Die bin staon bleven. Ik hebbe et voegeltien in de hal kregen. Hi’j flodderde naor de overloop. Vervolgens heb ik de veurdeure loszet en… et voegeltien vleug de vri’jhied weer integen. Gelokkig mar.

Ik hebbe vannaacht wonderlik droomd. Ik drome vaeke en vaeke aekelik. Mar vannaacht niet. Ik kuierde bi’j de Lende langes in de richting van Berkoop. Daor bleek een kuierpad te wezen. Doe ‘k op ‘e greens van Ni’jhooltpae en Berkoop was, bleek daor een kleine barg te wezen daor een groot iezeren kruus bovenop ston. Ik wone mien hiele leven al in Ni’jhooltpae, mar ik wus dus niet dat die barg daor was. Ik klom naor et iezeren kruus en zag doe dat d’r een hoolten brogge over de Lende lag en an de overkaant was een theeschinkeri’je of zo. D’r was een terras an et waeter daor aj’ heerlik zitten konnen. En dat heb ik dus ok nooit weten dat dat d’r was. Ik praotte nog mit een peer mannen van Staotsbosbeheer en doe kuierde ik weeromme en docht inienend da’k toch zeker ok wel es een keer weer naor mien wark mos. Dat droom ik dus geregeld. Ik bin al dattig jaor niet meer op ‘e belastinginspektie an et wark, mar ik drome geregeld da’k me zorgen maeke da’k al zolange thuus van et wark bin. Ik maeke me ok zorgen da’k d’r nao zolange tied daor vermoedelik niks meer van snappen zal. Ik nam me veur da’k naor de dokter gaon zol mit de vraoge a’k haost weer an et wark moeten zol. En doe wodde ‘k wakker en wus weer da’k al haost tachtig bin en nooit weer an et wark hoeve. Mar die droom komt zeker weer.

Ik hebbe et boek 2023 Facebook Moments van Frits Plantinga lezen en veural bekeken. De man is een geweldig goeie fotograaf. D’r staon schitterende netuurfoto’s in et boek. Prachtige bloemen en alderhaande waeterwild. En de meerst mooie zunsonder- en -opgangen. Wat is de wereld mooi, daenk ie aj’ al dat moois zien, en wat vernielen de meensken et.