Droom

Ik blieve mar over mien wark bi’j de belastingdienst dromen. Vannaacht was et weer raek. D’r bin twie soorten dromen. Ik bin daor en wete niet wat a’k doen moet of ik moet wark doen daor a’k niks van begriepe. Dat laeste was vannaacht et geval. An et aende van zoe’n droom kom ik steevaaste tot et besef dat ik ommes al oold bin en daor hielemaole niet hoeve te warken. Ik kan zo votgaon. Dat locht dan slim op en dan wor ik wakker. Wat toch een geties mit vroeger. Vandaege he’k een Naozoemerlaand-boek verstuurd naor Martsje de Jong. Zi’j zal et boek bespreken veur Omroep Frieslaand-radio. Dat het ze twie jaor leden mit Et liek in de Lende ok daon. Daor hadde ze doe een protte lof veur. Mit dit boek moe’n we dat nog even ofwaachten.

Poes is gek op brokkies en snupies van Whiskas. En doe kwam Anke mit een zakkien Purrfections van de Action. Die moch ze daor gratis mitnemen. We hebben wat van dat spul veur poes op ‘e vloer legd. Poes keek d’r bi’j, sneuf d’r es an en is d’r doe bi’j weglopen. Ik wus wat hi’j docht: Hoe kun jim een fesoenlike katte disse troep veurzetten!