Drokte

Wat een drokte de laeste peer daegen, mar wel een gezellige drokte. Gistermorgen ha’k aachternichte Ria uut Papendrecht op vesite. Zi’j hadde mit een kammeraodske fietstochten in Drenthe maekt en kwam in Ni’jhooltpae nog even bi’j de femilie an. We hebben genoeglik bi’jpraot, hebben een hiempe appelgebak behaffeld en doe bin ik naor Berkoop gaon en zi’j naor Jan en Ellie. Doe de laeste Eupen Stal-middag d’r op zat, kreeg ik thuus uutvanhuzers. Hendrik en Beitske van der Meer uut Jorwerd kwammen mit de camper de oprit op. Ze hebben bi’j mi’j waarm eten had en we hebben de hiele aovend genoeglik praot. Ze hebben slaopen in de camper en vandemorgen bi’j mi’j broodeten. Ik kenne Hendrik en Beitske al hiel lange. Ze wonen in Jorwerd in et vroegere huus van Geert Mak. Ze bin zoe’n betien wereldberoemd wodden deur de literaire bustochten die ze orgeniseerden van 1991 tot 2005. Ik hebbe an alle bustochten mitdaon. De Halbertsmatocht kwam deur de Stellingwarven. As et volk dan eten hadde in Et Waopen in Berkoop mochten Zwaantje Kuiters en ik een klein Stellingwarfs pergramme prissenteren. Wat was dat een mooie tied. Doe Hendrik en Beitske d’r nog weren, kwammen de beide tuunmannen om de tuun te beredden. Die hebben hier koffiedronken. Daornao bin Hendrik en Beitske votgaon. Even laeter hadden de tuunmannen heur wark ok daon. Ik hebbe gauw een prakkien zoerkool had en bin doe naor Berkoop gaon om de pepiereboel angaonde de verkope van boeken daor henne te brengen. We hebben tiedens Eupen Stal veur 2.702,55 euro verkocht. Dat hadde aorig meer west hebben kund as ik niet in et ziekenhuus belaand was. Vandemiddag bin ‘k op ‘e fiets naor Hooltpae west veur de verjaordag van Vrouwkje, heur eerste verjaordag nao et wegraeken van Eppie. Zo gaot et leven deur…