Drokproef Parredies

Vandemorgen he’k op ‘e fiets naor fysiosport in Wolvege west. Et was even hiel aander weer. We kregen vandemiddag zels een lekker bujgien en et wodde niet waarmer as 20 graoden. Now kuwwe even bi’jkommen veurdat een ni’je hittegolf op oons ofkomt. Gao d’r mar vanuut dat dit nog mar et begin is. Et zal in de toekomst zeker nog slimmer wodden. We zullen almar meer last en hinder van de klimaotveraandering kriegen. Et zal een klimaotkrisis wodden. Eigen schuld. De netuur reageert op et foute gedrag van meensken. Mar ja, zolange as et eigenbelang almar veurop staot…

Eddy van der Noord van uutgeveri’je Louise stuurde me eregister de drokproef van mien verhael Parredies dat in et kedoboek van de Friese Boekeweke komt te staon. Mit verhaelen van vuuf aandere schrievers. Mien verhael is 15 bladzieden in drok en d’r staot een mooie tekening van mien oolde huus bi’j die maekt is deur de Bildtse keunstener Hendrik Elings. Ik hebbe et verhael nog een keer korrigeerd en nog een stokmennig kleinigheden ontdekt die veraanderd wodden moeten. Ik hadde twie keer een spatie vergeten, d’r ston een ofbrekingsfout in, en d’r moet nog een witregel anbrocht wodden. Ik hebbe et weerommestuurd en krieg et dan nog een keer om nao te kieken as alles goed veraanderd en verbeterd is. Ik vien et een ere om van ’t jaor mit een verhael in et kedoboek te kommen!