Drokke warkdag

Ik bin vandaege drok an et wark west, wat moej’ aanders ok mit dit aekelike haastweer. En wat een ellende dat et aovens om zes ure al donker is. Harrekrastes nog an toe, wat he’k daor toch een hekel an. Ik bin vandemorgen even naor de Schrieversronte in Berkoop west om heur de tien Nijntje-boekies te brengen. Veerder he’k een kollum schreven en uutwarkt en ik bin nog mit een lang verhael an et proezen west. Butendat he’k een brief schreven an mien vaaste schriefmaot, een bekende Friese beeldhouwer. Ik hadde vleden weke een brief van him kregen. We schrieven mekeer al een peer jaor brieven, echte oolderwetse brieven mit de penne en over de post, die laeter naor et archief van Tresoar in Liwwadden gaon. Hieronder een foto die ‘k gister in Nunspeet maekte. Doe was et nog prachtig naozoemerweer en leupen d’r nog zat meensken in de kotte broek.