Drokke warkdag

Et was gister wel een mooie aovend in Bolsward. D’r was zeker wel een veertig man pebliek. Mar ik hebbe me in twie verhaelen even verzind of een stokkien tekst mist. Dat is de meensken vermoedelik niet opvalen, mar et is mi’j niet naor de zin. Ien van de verhaelen he’k vandaege drekt weer rippeteerd. Van de kommende zundag maek ik een rippeteerdag. Et kan en et moet beter. Mooi fietsweer is et toch niet meer. Vandaege he’k ok een kollum nog es tegen et locht hullen en die doe verstuurd naor de kraante. Een kollum over poes Marja en meulepoes Billie uut Winterswiek. Butendat he’k een verhael hadde-op veurlezen. Dat za’k aansen nog een keer doen en morgen en overmorgen ok. Ik moet dat lange verhael zaoterdagmiddag veurlezen in Linde. Et hoeft dan wel niet uut et heufd, mar et moet wel goed. Waor leg ik de klemtoon en waor waacht ik hiel even? Mooi veurlezen is ok een keunst. De rest van de dag he’k doende west mit de twie filmlieties. Mit de iene vertaeling bin ‘k wel tevreden. Mit de aandere niet echt. Et is een tekst die niet dichte bi’j me staot. Dan lange zinnen, dan hiele kotte zinnen, dan wel riem, dan gien riem. Slimme drege om te vertaelen. Wie moet dat zingen en hoe moet dat zongen wodden? Ik hebbe in ieder geval mien best daon, mar as dat in dit geval genoeg is, is mar de vraoge.