Drokke dag

Gisteraovend begon de prachtige Deense misdaodserie Those who kill op ‘e tillevisie. Ik hebbe twie ofleverings zien. Hiel mooi en spannend! Vlak veurdat de serie begon, kree’k een mailtien van dagboeklezeresse Feikje die me attent maekte op ‘e website van kabberetkenner, theaterdirekteur en schriever Frank Verhallen. Die schreef over De eerste Bloemlezing van de Nederlandse poëzie die saemensteld wodde deur Tsead Bruinja. En hi’j hadde mien gedicht Mien oolde huus d’r in et Stellingwarfs en Nederlaans bi’j zet. Zoks is toch aorig. Vandaege over een weke za’k acht van mien gedichten in et Stellingwarfs en Nederlaans veurlezen in Bargen an Zee. Dat allemaole naor anleiding van die bloemlezing. Ik hebbe vandaege kleine teksten schreven om van et iene naor et aandere gedicht te gaon. En ik hebbe alles oplezen, et is percies een kertier praoten. Dat moet ok. Ik zal et de kommende weke nog een keermennig oplezen. Ik hebbe ok verhaelen rippeteerd veur de optredens van donderdag en zaoterdag. Donderdagaovend bin ik in De Pleats in Burgum. Iederiene mag daor naor toe, krek as in Bargen an Zee. Zaoterdag bin ‘k op ‘e Lieke te vertellen. An et aende van de middag he’k Pieter en Peter op vesite had. We hebben genoeglik bi’jpraot. Pieter is mit meer as een vorrels jaor an kraanten weer op huus an gaon. Zodoende was et een drokke dag.

Hieronder nog een foto van een schilderi’je van Marius van Dokkum die ‘k gister in Hadderwiek maekt hebbe. Dit stelt een bureruzie veur. Ik daenke dat de Riedende Rechter hier wel an te passe kommen moet. Een blikkien van die groffe kerel leit in de tuun van de buren. Krek over et schut… Daor hebben ze dus allemachtig ruzie omme.