Drokke dag

Et was en is een drokke dag. Vandemorgen bin ‘k op ‘e fiets naor fysiosport in Wolvege west. Wat was et een stok koolder as gister! Veural op ‘e weerommereize. Doe ha’k de wiend tegen en d’r ston een koolde snoeverd. Om kwat over iene vandemiddag wa’k al in et ziekenhuus in Et Vene om bloed prikken te laoten. Dit as veurbereiding op een gesprek mit de internist over een peer weken. Ik hebbe in Wolvege nog bezine tankt: 2,22 euro de liter. En now stao ‘k zowat op ‘e sprong en gao al weer vot. Ik mag vanaovend mitdoen an et pergramme Reuring op de Dele in de mooie Karstenhoeve in Runerwoold. Dat is de wereld niet uut. Ik zal daor drie keer een verhael vertellen en hoeve et daor niet allienig te vertonen. Ria Westerhuis lest gedichten veur en Heeren Oud-Zuid zorgen veur meziek. Et wodt grif een slim genoeglike aovend!