Drokke dag

Et was een drokke dag en ik bin now om even veur achten krek thuus. Vandemorgen he’k naor fysiosport in Wolvege west en van daor bin ‘k deurreisd naor kapster Bertha in Et Vene. Ik hebbe daor eerst een koppien thee mit een koekien had en doe het ze me in een ure tied minstens tien jaor jonger maekt. Nao ofloop he’k d’r een koppien soep, een uutsmieter en nog een bakkien thee had. Vandemiddag kwam kammeraod Douwe hier op vesite. We hebben al praotende de hiele Friese en Stellingwarver literaire wereld even bi’jlanges west. Butendat hewwe overlegd over twie optredens die we in meert tegere in Appelsche verzorgen zullen. We vertellen dan ofwisselend verhaelen in et Fries en Stellingwarfs. We zullen ok et verhael De drie kwakzalvers van de Vlaamse schriever Louis Paul Boon vertellen. Ik vertelle de eerste helte van dat verhael in et Stellingwarfs en dan vaalt Douwe in et Fries in en vertelt de rest van et verhael. Ik zal et weer uut et heufd leren gaon. Et kun zodoende mooie middaegen wodden. We hebben vanaovend heerlik eten had in resteraant De Rustende Jaeger in Hooltpae. Et zat daor stampvol eters. Een drokke mar mooie dag!