Johan Veenstra
Stellingwarver schriever en verteller
Plaetst op 26 jannewaori 2025.
Wat bin ik bliede dat ik die mooie goolden helm en die drie aarmbanen van goold in et Drents Museum laestdaegs nog zien en bewonderd hebbe. Dat onvervangbere spul zuwwe mit disse torenhoge gooldpriezen nooit weerommezien. Et is vreselik. Meensken bin echt tot alle slechts in staot. Dat wus ik vanzels wel, mar et is iederkeer weer droevig om mit te maeken.
Eindelik was d’r weer zunne, dat ik hebbe nao et eten vandemiddag een kleine kuier maekt. Bi’j de Scheene en mien oolde huus langes. Wat is et overal een modderproeze. En veerder he’k lange in mien warkkaemer zeten. Ik hebbe schriefwark daon veur een projekt dat veureerst nog geheim blieven moet. En as et niks wodt, dan blift et veur altied geheim. Zo simpel is et. As et wel wat wodt komt et vanzels wel in de kraanten en hier te staon. Dat is dus ofwaachten, mar ik warke d’r wel an deur. Ik hebbe ok weer doende west mit een wat langer verhael daor a’k deur alderhaande drokte in stoeken bleven was. D’r ligt ok nog een verzuuk en schrief een stok over twietaelighied, mar ik wil dit eigen verhael de kommende tied eerst ofmaeken. En dan mar weer zien… Ik hebbe de kollum Stellingwarf first! die ‘k gister schreven hebbe nog wat veraanderd en mooier maekt. Wat zal d’r gebeuren as extreem rechts hier de gemienteraodsverkiezings winnen gaot? In Amerike zal de demekraosie staorigan uuthold wodden. Et beroemde Vri’jhiedsbeeld in New York zicht et niet meer zitten en stapt op. Veurdat de vri’jhied hielemaole vot is en de Vrouw van de Vri’jhied naor een strafklonie deporteerd wodt. Een trouwe dagboeklezer uut Sneek stuurde me dit plaetien toe.