Drokke dag

Et is al weer een drokke dag… Vandemorgen he’k op ‘e fiets naor Wolvege west. Bi’j de appeteek he’k een flut medesienen (400 tebletten) haeld en bi’j De Jong Optiek he’k mien ni’je zunnebrille ophaeld. Vandemiddag veurspelden ze regen, dat doe bin ‘k in de auto naor Et Vene west. Eerst naor de kpn-winkel. Ik kreeg al een weke iederkeer mailties van de kpn mit een anbieding. Ik mos argens op drokken, mar ik vertrouwe haost niks. Was dat gien nep/spam? Ik kriege ok iederkeer berichten van et Gerecht in België, da’k me daor verantwoorden moet. Dat is zeker spam, want ik hebbe in België bi’j mien weten nog nooit een misdaod pleegd. Mar de aorige vrouw in de kpn-winkel zee dat et gien spam was, dat ik hebbe een ni’j kontrakt ofsleuten en dat leverde me 42,50 euro op. Daor kan ‘k wel een keer van uut eten. Niet bi’j Jan Smink mar wel bi’j de Koepelbos. Vervolgens bin ‘k naor kapster Bertha gaon. Daor he’k eerst een bakkien thee en een beschuut mit erebeien had. Vervolgens het ze een ure wark had om me een betien toonber te maeken. Doe he’k een koppien gruuntesoep had, een uutsmieter en nog een koppien thee. Heerlik! Ik kan now vanaovend netties naor de eupening van een tentoonstelling en morgen za’k de hiele dag mit een vrouw op stap. Hoe laete as et dan wodt… Mit vrouwluden weej’ dat nooit.