Drok weekaende

Et is een weekaende mit een volle agenda. Dat is an de iene kaant wel wat jammer, want ik kan now niet echt van et mooie weer genieten en gien aende fietsen. Mar ja, et is zoas et is. Gisteraovend he’k hier in oons mfc De Ni’je Stienze verhaelen verteld veur de vri’jwilligers van de karke. Veur meensken dus uut Hooltpae, Ni’jhooltpae, Der Izzerd en Hooltwoolde. Et was een mooie aovend. Veur et schoft he’k op verzuuk serieuze verhaelen en gedichten verteld en nao et schoft humoristische verhaelen. Nao ofloop bin ‘k nog een schoft bleven om wat nao te praoten. Hiel gezellig! Vandemiddag ha’k eerst vertellen zuld bi’j de Schrieversronte in Berkoop, mar dat gong niet deur, dat zodoende kon ‘k naor de meitiedsbi’jienkomst van de Alde Friezen in Het Wapen van Baarderadeel in Jorwerd. Ok dat was hiel genoeglik. De meersten bleven daor ok te eten. Dat doe ik tot now an toe ok altied. D’r was een buffet mit heerlik eten. Die kok daore kan d’r wel wat van. Veurofgaonde an de bi’jienkomst he’k een peer foto’s maekt. Boven: Jorwerd mit links de karke en rechts de ziedkaante van Het Wapen van Baarderadeel. Onder: de mooie karke van Jorwerd tussen de bomen die in et blad beginnen te kommen.