Drinkende schaopen

Et was vandemorgen eerst kil en mar een graod of 12. Vermoedelik te koold om nog een keer mit de boot vot te gaon. Vleden weke het de laeste keer van dit jaor west, ankem weke gaot de boot et waeter uut. We hebben vandaege een heerlike fietstocht over et Dwingelderveld maekt. Doe we in Dwingel begonnen te fietsen, was et nog mar 15 graoden en de zunne was d’r niet bi’j. Mar… doe we op et Dwingelderveld weren, kwam de zunne d’r volop bi’j en wodde et een heerlike dag mit een oplopende temperetuur naor 20 graoden. Et was drok mit fietsers. Iederiene wol nog even van disse mooie dag profiteren veurdat et weer regenachtig wodt. Et was spietig dat de heide zowat uutbluuid was, hier en daor was nog mar een paors veltien te zien. Nao de fietstocht hewwe, lekker in de zunne, op et terras van resteraant De Brink wat eten en drinken had. Hieronder twie foto’s die ‘k vandaege maekt hebbe. We kwammen krek as eerder twie schaopskuddes tegen. Hieronder de eerste kudde die we tegenkwammen. De schaopen leupen van de iene kaant van et fietspad naor de aandere kaant van et pad. Iederiene bleef staon en maekte foto’s. Ik vien disse fotomedellen duzend keer zo mooi as de meenselike fotomedellen die bi’jtieden niet weten hoe as ze kieken en heur anstellen moeten. De schaopen leupen an alle kaanten om oons henne. An de aandere kaant van et pad was een grote poele en daor konnen ze drinken.