Drie manluden

Et is now goed negen ure aovens en ik bin krek thuus nao een aoventien uut eten mit Harry, Frans en Jan. Mit die drie manluden kuj’ werachtig wel een aovend te zuke brengen! Et was slimme genoeglik. Ze kwammen vandemiddag tussen vier ure en half vufe eerst bi’j mi’j thuus. We hebben eerst wat bi’jpraot en ik hadde eigenbakte kokeskoeke en drinken veur heur. Om kwat over zesse biwwe in de auto stapt en naor resteraant Boszicht in Ni’jberkoop reden. Daor hewwe heerlik eten. Alle viere een schnitzel, mar wel verschillende soorten schnitzels. En vanzels ok wat veurof en wat nao. Uut eten mit goeie vrunden… Op zoe’n meniere is et leven zo gek nog niet! Ik zie Harry en Frans over niet al te lange tied trouwens al weer. Dan zuwwe mit een bus vol kultuurvolk vanuut Wolvege naor de Harmonie in Liwwadden.