Drie jaor oorlog

Vandaege hewwe weer overleg over een projekt had in et gebouw van de Schrieversronte in Berkoop. Ik hebbe ok nog een peer verhaelen rippeteerd veur et optreden van morgenmiddag en een kollum die ‘k al in klad schreven hadde he’k naokeken, befiekt en in de komputer stopt.

Et is vandaege drie jaor leden dat Ruslaand een gruwelike oorlog begon mit Oekraïne. Ik zette doe de vlagge van Oekraïne bi’j mien dagboekstokkien. Om zien te laoten waor mien sympathie lag. Dat doe ‘k vandaege weer, want de oorlog is nog niet over. Hoe hawwe drie jaor leden daenken kund dat et westerse, vri’je, demekraotische Amerike onder Trump ofglieden kunnen zol naor een diktetuur. Dat liekt te gebeuren. Trump en Poetin lieken zels de beste buisies. De iene is niet beter as de aandere. Et is walgelik en levensgeveerlik volk. De toestaand van now wodt wel vergeleken mit 1938. Doe ston de wereld op ‘e raand van een vulkaan. Doe gong et mis. Hoe zol et now kommen?