D’r op uut

We bin d’r vandaege weer op uut west. Et was heerlik zaacht weer en we hebben haost etzelde daon as vleden weke. Soms was de zunne d’r bi’j en soms motte et ok een betien. We bin eerst weer naor Rinsma op ‘e Gediek west. Daor hewwe de drie broeken ophaeld die we vleden weke kocht hadden en die een hiel klein tippien kotter maekt wodden mossen. Vervolgens biwwe weer naor Tuundorama in Drachten-Zuud gaon. We zollen vleden weke mooie bloempotten kopen, mar doe twiefelden we an de grootte. Vandaege kwammen we besleugen op et ies en hebben ze kocht. We mossen ok hydrokorrels hebben, mar de kleine poedegies mit dat spul weren bi’j Tuundorama uutverkocht. We bin doe mar deurreden naor Intratuun in Drachten. Daor hadden ze dat wel en ik hebbe daor ok mar een mooie voertaofel veur de voegelties kocht. We hebben daor ok wat drinken had mit wat lekkers d’r bi’j. Vanaovend hewwe heerlik eten in resteraant ’t Koepelbos in Berkoop. Ik hebbe daor lekkere zalmfilet had.