Dosla sam

Ik bin vandaege zowel naor Berkoop as naor huus toe bi’j de Kuunder langesfietst. Mit mekeer was dat 23 kilemeter. Jim kun me daor in Berkoop trouwens op twie plakken tegenkommen. Dat kree’k van pattie meensken al te heuren. Ik zitte in et gebouw van de Stellingwarver Schrieversronte boeken te verkopen en zette d’r, as meensken dat willen, een haandtekening in. Butendat is mien stemme te heuren in de Meulebos. Op ien van de baankies kuj’ daor even tot ruste kommen mit de Servische dichteresse Vitomirka Trebovac uut Novisad en mi’j. Ie kun heur stemme heuren as ze heur gedicht Došla sam veurlest. Ie kun mien stemme heuren as ik heur gedicht in et Stellingwarfs veurleze. Dan hiet et ik kwam. Ik hebbe de Nederlaanse vertaeling van heur gedicht vertaeld in et Stellingwarfs. Gitte Brugman schreef d’r vandaege lovend over in de Liwwadder Kraante. Abel Darwinkel, de direkteur van de Schrieversronte het me vandemiddag op petret zet op mien vaaste verkoopplakkien. Zie hieronder. Morgen bin ik niet ik Berkoop, dan vervangt Fettje me. Ik hebbe mien wekelikse vri’je dag en we zullen mit de boot et waeter op. Woensdag bin ik weer persent.