Dörpsmark

Gisteraovend tussen zeuven en acht ure was d’r weer mark in Ni’jhooltpae. Dat is ieder jaor van half juli tot begin september zo en altied op ‘e donderdagaovend. Meensken die een gruuntetuun hebben en veur heurzels te vule hebben, staon dan bi’j oons mfc De Ni’je Stienze mit heur negosie. En meensken die gien gruuntetuun hebben, zoas ik, kun daor dan henne om hatstikke vas spul te kopen veur een slieterspriesien. Ik gao d’r al jaoren altied henne, want ik vien dit een hatstikke goed initiatief. Ik hebbe gisteraovend een bossien bloemen kocht en een peer bakkies mit rooie beien. Van die rooie beien he’k gisteraovend drekt sjem maekt. Heerlik! Butendat he’k vandaege ok nog een kruudkoeke mit rezienen, sukade en gember bakt. Ok heerlik! En veerder maek ik de slaopkaemer beneden alvast klaor. As et ankem weke dattig graoden of nog waarmer wodt, gao ‘k beneden slaopen. Dat schilt altied wel een graod of wat. Boven is et dan snikhiete. As et zo hiete was, zee mien moeder altied: Et komt op et meensdom an! Vandaor da’k ankem weke beneden slaopen gao.