Dörpsfeest

Ik hebbe de hiele middag keken naor de zeskaamp op et dörpsfeest. Dat is in wezen tegenover mien huus, een peer stappen en ik bin d’r. Ik hebbe d’r lekker bi’j zeten en vanzels niet mitdaon an zokke meraokels. Ik zal maendagmorgen op vekaansie en wil de bonken niet breken veur de tied. Mar et was wel gezellig en ik hebbe mit alderhaande meensken praot. Snackbar Canada uut Appelsche ston d’r, dat ik hebbe mar wat lekkers mit naor huus toe neumen. Een brotien hamburger en een frikandelle. Lekker gezond eten! Doe ‘k thuuskwam heurde ‘k een vreselik gemiauw dat van boven kwam. Et was weer es zoveer. Poes was bliekber bi’j me langessloept doe ‘k even op ‘e aachterste slaopkaemer was. Ik hebbe niks zien, hebbe de deure aachter me dichtedaon, en bin vot gaon. En doe kon poes d’r niet meer uutkommen en gong hi’j allemachtig tekeer. Asof et mien schuld was. Zo vuult hi’j dat misschien ok wel, mar et was zien eigen schuld. Om et grote leed te verzaachten he’k mien schuld ofkocht mit wat extra lekkere kattesnupies.

D’r kwammen vandeweke verscheiden reakties betreffende mien kollum Mariska in de Liwwadder Kraante van deensdag. Dat gaot dan over Mariska Rikkers uut Wolvege die veur de BBB in de Twiede Kaemer komt. Van twie vrouwluden uut Ni’jhooltwoolde kree’k de komplementen. Een man op et dörpsfeest vun me nogal kritisch. Een man uut Sneek mailde: Ik schiet nog in de lach als ik denk aan jouw column. Mariska wordt door jou behoorlijk uitgedaagd. Een man uut Oosterwoolde mailde: Dat was weer een mooie, raeke kollum. En een vrouw uut Wolvege mailde: Hulde, meneer Veenstra, voor uw column in de LC die ik zojuist las! Loeischerp en mild tegelijk, dat is voorbehouden aan de ware kunstenaar.

Ik kreeg gister een kaorte van Henk en Philo. Zi’j bin op vekaansie in Tossens, dat ligt tussen Bremerhaven en Wilhelmshaven. Moin von der Küste.