Donald

We bin de hiele dag mit de boot et waeter op west. Van vandemorgen half elf tot vanaovend twintig over zesse. Et was eerst bewolkt en 19 graoden. Best nog een betien fris. De jasse kon wel an. Mar vandemiddag was de zunne d’r volop bi’j en was et 22 graoden. Heerlik weer! We bin over Wartena naor Eernewoolde veerd en doe naor Grou en weeromme naor De Veenhoop. Daor hewwe tussen drie en vier ure luncht op et terras van hotel Ie-Sicht. Daor gong een ente naost oons taofeltien staon. Et was overdudelik wat die graeg wol. De serveerster vertelde dat hi’j van Donald hiette en naor meensken gong daor hi’j van docht dat die him wel wat geven wollen. Hopelik is disse Donald nuumd naor Duck en niet naor Trump. Et was trouwens een schraandere ente, want hi’j zocht de goeie meensken d’r wel uut. We hebben him kleine stokkies bolle geven, een stokkien kroket, stokkies wottel, een blattien slaod, en dan nog brokkies van een kletskop en een doempien. Doe Donald docht dat d’r niks meer te haelen was, is hi’j van et terras scharreld en et waeter inploemst. Daor begon hi’j drekt te drinken. Even laeter was hi’j weer op et terras en gong hi’j naor een vrouw. Die wol wel mit him praoten, mar hi’j kreeg niks van heur. An zokke meensken hej’ vanzels hielemaole niks! Hieronder twie foto’s van een mooie dag. Boven: disse mooie tegenligger gong oons tussen Wartena en Eernewoolde veurbi’j. Onder: oonze goeie kammeraod Donald.