Doktersdag

Vandemorgen he’k tillefonisch kontakt had mit de dokter uut et ziekenhuus. Ze zee dat et goed was da’k alderhaande dingen schrappe, hoe jammer dat ok is. Veural een hieleboel wark in kotte tied, zoas tiedens Eupen Stal, is niet goed. Ik moet beter op mien leeftied letten. As et trouwens weer es misgaot, bin ik weer van hatte welkom in et ziekenhuus! Dat is nog es een aorige dokter! Vandemiddag bin ik keurd veur een ni’j riebewies. Ik wor in jannewaori 80… Et is goed gaon. Binnen een maond krieg ik bericht van et CBR en kan ik naor et gemientehuus om een ni’j riebewies an te vraogen. Doe ‘k weer thuus was, las ik in Max-Magazine dat de keuring mit ingang van 1 jannewaori veur 75-plussers beheurlik strenger wodt.

Vandemorgen was et weer es een keer zoveer. Ik was boven even op ‘e aachterste slaopkaemer, poes glipte de deure in en scheut vermoedelik drekt onder et bedde. Ik hadde niks in de gaten en dee de deure even laeter aachter me dichte. En doe was poes vot… Ik docht dat hi’j butendeure was mit dat mooie weer. Mar doe ‘k een peer uren laeter in de hal was, heurde ‘k een vreselik gemauw van boven kommen. Ik hadde poes opsleuten. Doe ‘k de deure veur him losdee, bleef hi’j vreselik mauwen. Miau, miau, miau… Dat betekent: hoe koj’ now toch zo en sluut mi’j hier op. Hi’j gong laankuut bi’j me op ‘e overloop liggen. Ik erkenne altied drekt dat et mien schuld was en alle leed wodt dan ofkocht mit wat extra snupies van Whiskas. En dan is alles weer goed. Tot de volgende keer…