Dokter

Vandemorgen he’k eerst henne te bloedprikken west. Een vervolgprikkeri’je van een vorrels jaor leden. Daornao he’k me een ni’je printer kocht. Et oolde ding dot et niet meer, pakt et pepier niet meer. Mien komputerhulp Marcel raodde me an en koop mar een ni’jen iene. Ze brengen him hier ankem weke donderdag en leggen me dan ok even alles uut. Want ja, ik bin een hiele domme man as et om technische dingen gaot. Hoe moet ik de inkpetronen verwisselen, hoe een verfrommeld pepier d’r uuthaelen? Vandemiddag bin ‘k al weer es naor de dokter west. Mien linkermiddelvinger is wat gevulig bi’j et bewegen. De dokter wet et ok niet. Niks args in ieder geval. Een spiertien of een pesien dat vervelend dot. Mar zo is d’r wel iederkeer wat mit et oolder wodden. Eerst mar gewoon wat anzien en alles doen. Dat lokt ok wel. Now ja, zolange as et verstaand mar scharp blift. Neffens mi’j zit dat nog wel goed, mar lichtkaans dat aanderen eerder in de gaten hebben dat zoks ok oftaekelt as daj’ dat zels in de gaten hebben…