Dokkum

Kammeraod Douwe uut Veenwoolden komt hier iene dag in ’t jaor en ik gao een dag in ’t jaor naor him toe. Omda’k nog wat kalman doe is et dit jaor een halve dag wodden. Naodat Anke hier gistermorgen et huus schonemaekt hadde, bin ik in de auto stapt en naor Veenwoolden toe reden. Ik hebbe een bakkien drinken had bi’j Douwe en Romkje en doe bin ‘k mit Douwe naor Dokkum gaon. Daor hewwe een kuier deur de mooie Friese moordstad maekt en we hebben Museum Dokkum bekeken. Een prachtig museum in drie historische gebouwen an de Diepswal. Zoas in et gebouw van de Admiraliteit van Frieslaand en Grunningen uut 1618. Netuurlik wodt d’r flink wat andacht an Bonifatius geven. Mar d’r weren ok mooie schilderi’jen en Fries eerdewark te zien. En… schitterend zulver van Dokkumer goold- en zulversmeden. Ik zol wel graeg zoe’n mooie zulveren branewienkoeme mitnemen hebben wild. Mar ja, zoks mag niet… Nao et museumbezuuk hewwe wat dronken in hotel-kefé-resteraant De Posthoorn, ok an de Diepswal. We hebben d’r een hiempien lekker gebak bi’j had. En doe biwwe naor De Westereen reden. Daor hewwe oonze gemienschoppelike webmaster Pieter ophaeld en mit him biwwe naor resteraant Old Dutch gaon. Daor hewwe lekker waarm eten had. Heerlike romige tomatesop. Wat een groot bod vol! Wel twie keer zovule as daj’ op aandere plakken kriegen. En wat een grote schnitzel! Ik hebbe d’r drekt een best stok ofsneden en dat he’k in de tasse stopt. Dat krie’k vanaovend dus op een plakkien bolle. Et eten is daor heerlik en goedkoper as op aandere plakken! We hebben ofpraot dawwe in et vervolg elk jaor een keer mit webmaster Pieter uut eten gaon. As daank veur al zien zegenrieke wark veur oons! Nao et eten hewwe Pieter weer thuusbrocht, we bin naor Veenwoolden reden, en daor bin ik weer in de auto stapt en naor huus toe gaon. Daor waachtte poes Marja op mi’j!